BAGUIO CITY – Naglusulos iti pwesto ti brigade commander ti cadet corps ti Philippine Military Academy (PMA) sumagmamano a lawas kalpasan ti insidente ti panag-hazing iti daydi Cadet 4th Class Darwin Dormitorio.
Sigun kenni PMA Commandant of Cadets Brigadier General Romeo Brawner Jr., nag-ikkat ni Cadet 1st Class Ram Michael Navarro ti PMA ‘Masidlawin’ Class of 2020 kas corps commander.
Kinunana a sinaruno ni Cadet Navarro ti panaglusulos da resigned PMA Superintendent Lieutenant General Ronnie Evangelista ken resigned PMA Commandant of Cadets Brigadier General Bartolome Bacarro.
Immuna nga immikkat iti pwesto da Evangelista ken Bacarro gapu iti prinsipyo ti command responsibility idi September 24, innem nga aldaw kalpasan a pimmusay ni Cadet Dormitorio.
Kabayatanna, napili met ti mistah ni Cadet Navarro a ni Cadet 1st Class Marion Dale Cordova kas baro a brigade commander ti PMA Cadet Corps.
Maikonkonsidera ti brigade commander wenno corps commander kas ‘top cadet’ ti akademya a napili manipud kadagiti top-performing members ti graduating class.
