--Ads--

Kinumpirmar ni Benguet State University President Kenneth Laruan nga adda dagiti retirado nga empleyado ti BSU nga agnumnumar paylaeng iti housing unit ti unibersidad iti baet a nalpasen ti kontrata dagitoy.

Kasaruno daytoy ti pablaak ti maysa a mannursuro iti social media a mangiyebyebkas iti saan nga umno a proseso para iti housing ti unibersidad.

Iti nasao a pablaak, kinunana nga adda dagiti empleyado a nagretiron iti serbisyo ngem agnumnumarda pailaeng iti housing unit ken maatap nga ipaspasada kadagiti kabagyanda wenno ti mala padrino system.

Malaksid iti daytoy, maatap nga ipaab-abangda daytoy kadagiti dadduma nga indibidwal.

Iti interview ti Bombo Radyo, inlawlawag ni Laruan nga adda ti proseso a masursurot nu maipapan iti housing no sadino adda ti nabukel a housing committee nga idadauloan ti Office of the Vice President for Administration and Finance a mangtutok iti daytoy.

Ti nasao nga opisina ti mangiproseso ken mangtingiting kadagitoy.

Inlawlawag pay ti University President a nu adda man ti available a housing unit, daytoy ket gapu ta binakantean dagiti retired employees iti unibersidad.

Ditoy met nga i-assess ti nasao a committee ti bakante a unit ken maipablaak para iti vacancy tapno maipaayan iti gundaway dagiti kwalipikado nga empleyado nga agaplay.

Dagiti aplikante ket mapili babaen iti housing policy criteria nu sadino maaddaan iti rankings.

Impetteng met ti nasao nga opisyal a kadawyan nga agbalbalin a violation ket ti saan a dagus nga ipapanaw wenno panangbakante dagiti retired employees kadagiti housing unit nga inukuparda.

Inlawlawag ni Laruan nga ipapaayanda met iti tallo a bulan nga extension wenno pawayway dagiti retired employees a saan a dagus a nangbakante iti housing unit.

Nupay kasta, adda latta dagiti retired employees a saan a pumanaw uray pay nalpasen ti tallo a bulan nga extension a naipaay kadakuada.

Awan met ti eksakto a bilang a dinakamat ti opisyal seknan ti bilang dagiti retired employees a naglabsing ngem kinunana a nangipaay dagitoy iti “Letter to Vacate.”

Imbinglay ni Laruan a naobserbaran ti Commission on Audit a bayat iti panaglabas ti panawen ket manaynayonan ti bilang dagiti aglablabsing kadagiti pagalagadan.

Mainaig iti daytoy, nagkiddaw metten ti BSU iti assistance manipud iti Office of the Solicitor General ken maisagsagana metten dagiti kaskenan a dokumento para iti posible a pannakaipila ti kaso kadagiti naglabsing.

Maibasar iti panagsukimat ti Bombo Radyo News Team iti 2024 Annual Report ti Office of the Vice President for Administration and Finance maipapan iti nasao nga issue, adda ti 16 a policy guidelines a nasken a suroten dagiti BSU Employees a naipaayan iti housing unit.

Maysa kadagitoy ti polisiya a mangipalpalubos kadagiti empleyado nga agtalinaed iti unit iti las-od ti lima a tawen no sadino maaddaan iti renewal iti mamin-uppat a daras, depende iti panagtingiting ti housing committee.

(𝙍𝙪𝙡𝙚 #6: 𝙏𝙝𝙚 𝙜𝙧𝙖𝙣𝙩𝙚𝙚 𝙨𝙝𝙖𝙡𝙡 𝙗𝙚 𝙖𝙡𝙡𝙤𝙬𝙚𝙙 𝙩𝙤 𝙨𝙩𝙖𝙮 𝙞𝙣 𝙩𝙝𝙚 𝙪𝙣𝙞𝙩 𝙛𝙤𝙧 𝙖 𝙥𝙚𝙧𝙞𝙤𝙙 𝙤𝙛 5 𝙮𝙚𝙖𝙧𝙨 𝙨𝙪𝙗𝙟𝙚𝙘𝙩 𝙩𝙤 𝙧𝙚𝙣𝙚𝙬𝙖𝙡 𝙛𝙤𝙧 𝙪𝙥 𝙩𝙤 4 𝙩𝙞𝙢𝙚𝙨. 𝙏𝙝𝙚 𝙧𝙚𝙣𝙚𝙬𝙖𝙡 𝙬𝙞𝙡𝙡 𝙗𝙚 𝙨𝙪𝙗𝙟𝙚𝙘𝙩 𝙩𝙤 𝙩𝙝𝙚 𝙚𝙫𝙖𝙡𝙪𝙖𝙩𝙞𝙤𝙣 𝙤𝙛 𝙩𝙝𝙚 𝙝𝙤𝙪𝙨𝙞𝙣𝙜 𝙘𝙤𝙢𝙢𝙞𝙩𝙩𝙚𝙚 )

Nakalanad metlaeng iti guidelines a nu agretiro ti grantee ket agleppas metlaeng ti panagnaedna iti yunit tallo a bulan kalpasan ti retirement daytoy.

Nu met adda dagiti saan a mapakadaan a pasamak kas iti untimely death, mabalin nga agnaed dagiti kabagyan ti grantee iti housing unit a pagnanaedanna iti agingga innem a bulan kalpasan ti ipupusayna.

(𝙍𝙪𝙡𝙚 #15: 𝙒𝙝𝙚𝙣 𝙖 𝙜𝙧𝙖𝙣𝙩𝙚𝙚 𝙧𝙚𝙩𝙞𝙧𝙚𝙨, 𝙩𝙝𝙚 𝙖𝙡𝙡𝙤𝙬𝙖𝙗𝙡𝙚 𝙩𝙚𝙣𝙪𝙧𝙚 𝙤𝙛 𝙨𝙩𝙖𝙮 𝙨𝙝𝙤𝙪𝙡𝙙 𝙚𝙣𝙙 𝙖𝙛𝙩𝙚𝙧 3 𝙢𝙤𝙣𝙩𝙝𝙨 𝙛𝙧𝙤𝙢 𝙧𝙚𝙩𝙞𝙧𝙚𝙢𝙚𝙣𝙩. 𝙄𝙣 𝙘𝙖𝙨𝙚 𝙤𝙛 𝙪𝙣𝙩𝙞𝙢𝙚𝙡𝙮 𝙙𝙚𝙖𝙩𝙝, 𝙩𝙝𝙚 𝙗𝙚𝙫𝙚𝙖𝙧𝙚𝙙 𝙛𝙖𝙢𝙞𝙡𝙮 𝙢𝙖𝙮𝙗𝙚 𝙖𝙡𝙡𝙤𝙬𝙚𝙙 𝙩𝙤 𝙨𝙩𝙖𝙮 𝙛𝙤𝙧 𝙢𝙖𝙭𝙞𝙢𝙪𝙢 𝙤𝙛 6 𝙢𝙤𝙣𝙩𝙝𝙨 𝙖𝙛𝙩𝙚𝙧 𝙙𝙚𝙖𝙩𝙝.")

Nailanad pay iti policy (Rule #16) a saan a rumbeng nga aramaten ti housing unit para iti commercial purposes, subleasing, assignment wenno Transfer of the University unit ken dadduma pay.

Sigun pay iti nakalap nga impormasyon ti Bombo News Team seknan iti basic requirements, mabalin metlaeng nga agapply dagiti awanan asawa nga empleyado ti unibersidad iti single housing bayat a dagiti met naasawaan ket mabalin nga agaplay iti family housing nu sadino agbayad iti agingga sangapulo ket lima nga aldaw ti aplikasyon.

Dagiti sumagmamano a criteria para iti ranking a pagbasbasaran ti committee no siasino ti kuwalipikado iti available unit ket ti nature of position, length of service, nature of work schedule, ownership of a house, spouse of the applicant ken child of the previous applicant.

Kabayatanna, impeksa ni Laruan a silulukat ti opisina daytoy para kadagiti addaan iti pakaseknan ken clarifications seknan iti nasao nga issue.


Iti agdama, awan pay laeng ti nangkonsulta kenkuana nga empleyado ti unibersidad maipapan iti nasao nga issue malaksid laeng kadagiti pablaak iti social media.//Bombo Noveh Organo

Watch Interview Here: https://www.facebook.com/share/v/1ABAJb2iwj/