Agbalbalin a pakaseknan ti Commission on Elections-Baguio ti kinaado dagiti campaign materials a nagkaiwara iti aglawlaw iti siudad.
Iti panakiuman ti Bombo Radyo kenni Atty. John Paul Martin, Election officer iti Commission on Elections-Baguio, kinunana a saanda a makontrol dagiti campaign materials gapu ta saan pay a nangrugi ti campaign period a mabalin a mangipaay iti bileg kadagitoy a mangipatungpal iti Oplan Baklas.
Sigun kenni Atty. Martin, para ita nga eleksyon ket maaramat ti online campaigning para kadagiti kandidato nu dagitoy ket nagparehistro iti online registration platforms idi napalabas a bulan.
Nakikoordinar metten ti Commission on Elections iti Meta AI para iti agreement a maikkat dagiti political campaigns aramat dagiti saan a nakarehistro nga account.
Gapu iti dayta, dagiti laeng nakarehistro nga account iti social media ti mabalin nga agpablaak maipapan iti panagkandidato dagitoy inton campaign period.
Kinuna ti election officer a dagiti social media platforms a mabalin laeng a maaramat ket ti Facebbok ken ti Instagram.
Kabayatanna, maipalagip a mangrugi ti panagkakampanya dagiti National candidates, inton February 11 angingga May 10 ita a tawen bayat a ti panagrugi ti panagkakampanya dagiti local candidates ket mangrugi inton March 28 agingga May 10, 2025.//Bombo Mera Pacpacan
