BAGUIO CITY – Naisayangkat ti ceremonial burial para iti daydi Igorot SAF trooper a kakaisuna a pulis a pimmusay iti napasamak a twin bombing sadiay Jolo, Sulu idi Lunes, August 24.
Immunan a nabigbig daytoy a ni Police Senior Master Sergeant Joe Michael Ananayo Langbis a tubo ti Ampusa, Tadiangan, Tuba, Benguet ngem naikamang sadiay Mindanao ken nagpa-convert iti Muslim, no sadino, addaan daytoy iti dua nga anak.
Naisayangkat ti nasao a seremonya sadiay Ampusa, Tadiangan, Tuba no sadino, dagiti personal a kagawaanna ti naikabil iti lungon a naitabon.
Nagserbi nga escort daytoy dagiti kakadwana a SAF troopers ken impaayanda daytoy iti full military honors babaen kadagiti kakadwana a commandos ken dagiti kameng ti Police Regional Office Cordillera.
Maipalagip a nangisayangkat iti nainsigudan a ritwal ti pamilya ni Langbis nga indauluan ti ama daytoy.
Naamuan a saan a napatgan ti kiddaw ti pamilya a maiyawid ti bangkay ti banuar ditoy Benguet.
Kabayatanna, malaksid kenni Langbis ket pimmusay metlaeng iti nasao a terrorist attack ni Staff Sergeant Manuelito Oria manipud Mabilong, Lubuagan, Kalinga, no sadino, naiyawid metten sadiay ti bangkay daytoy.
