BAGUIO CITY – Panggep ti Deparment of Education (DepEd) – Cordillera a mangaramid iti coffee table book a manglaon kadagiti impormasyon iti kultura ken tradisyon a mangiyam-ammo kadagiti nagduduma a tribo wenno Indigenous Peoples (IPs) iti Cordillera.
Sigun kenni DepEd-Cordillera regional director Estela Cariño, aramidenda daytoy kasaruno ti panakababalaw dagiti learning modules a naglaon iti biddut nga impormasyon seknan kadagiti Igorot.
Kinunana a no malpas ti nasao a libro ket agiwarasda iti kopya daytoy kadagiti nagduduma a rehion iti pagilian.
Sigun kenkuana, manarimaan ti koordinasyonda kadagiti lokal a gobyerno para iti nasao a plano.
Innayonna a no matungpal ti plano ket dakkel daytoy a tulong tapnu maiyam-ammo dagiti Igorot ken maipaayan ti publiko iti umno nga impormasyon.
Naamuan a nagtaripnong dagiti schools division superintendents iti Cordillera tapnu repasuen dagiti learning materials nga inaramidda tapnu maipasigurado a saan nga iti rehion a nagtaud dagiti biddut nga impormasyon seknan kadagiti Igorots a nailanad kadagiti learning modules iti dadduma a pagadalan.
