Makumikom ti Commission on Elections para iti panagrugi iti campaign period para iti umadanin a 2025 Midterm Elections.
Iti panakiuman ti Bombo Radyo kenni Atty. John Paul Martin, election officer iti Commission on Elections-Baguio, kinunana nga ita a bulan angingga inton Marso ket naituding para iti training dagiti agserbi kas electoral boards, dagiti DepEd Supervisor Official (DESO) technical support ken daduma pay.
Malaksid iti dayta, manarimaan ti panakaberipikar dagiti botante, kalpasanna ket mauray ti computerized list dagiti agbotos inton May 12.
Sigun kenni Atty.Martin, mabalin nga agturong dagiti botante iti opisina iti Commission on Elections tapno maammoanda ti precinct a pagbotosanda.
Ngem mabalin met a maamoanda daytoy babaen iti COMELEC Precinct Finder wenno kadagiti maipasa a listaan iti barangay.
Daytoy ket tapno saan a marigatan dagiti botante a mang-ammo kadagiti presintoda inton eleksyon.
Para ita a national ken local elections, nagbaliw ti clustering kadagiti precinct gapu ta daytoy ket dumanonen iti 1-K a botante.//Bombo Mera Pacpacan
