BAGUIO CITY- Manamnama a sumangpet ita nga lawas dagiti machine wenno ti Vote Counting Machines (VCMs) nga aramaten ti Baguio City para iti eleksion 2022.
Iti interview ti Bombo Radyo Baguio kenni Election Officer Atty. Reyman Solbita, kinunana a dumanon iti 239 dagiti VCMs a maiwaras kadagiti 239 metlaeng a bilang ti presinto iti siudad.
Sigun kenkuana adda met ti 10 a contingency machines wenno VCMs a nailatang iti intero a probinsia ti Benguet a naka-standby wenno maaramat nu maaddaan iti parikot dagiti makina ti tunggal presinto.
Imbinglayna pay nga adda ti nakasagana nga generator set tunggal presinto a maaramat nu mapukaw ti suppy ti kuryente kabayatan ti eleksion malaksid nga amin dagiti VCMs ket addaan iti baterya.
Kabayatanna, awan pay ti aldaw a naituding iti panakaideliver dagiti official ballots iti siudad gaputa saan pay a kompleto a naimprinta ti balota isunga awan pay ti pakdaar manipod iti komisyon.
Agtultuloy met ti panagsanay dagiti mannursuro iti lokalidad nga agserbi iti aldaw ti eleksion.
