Agtultuloy ti panagsagana ti Commission on Elections-Cordillera para iti umadanin a 2025 National ken Local Elections.
Iti panakiuman ti Bombo Radyo kenni Atty. Elenita Julia Tabangin-Capuyan, Provincial Election Supervisor 3 iti Office of the Regional Election Director-Cordillera, kinuna a makumikom dagitoy kagiddan ti agtultuloy a panakaipatungpal ti Automated Counting Machines (ACM) roadshow nga agleppas inton ngudo iti Enero.
Gapu iti dayta, maal-allukoy dagiti nagduduma a barangay ken organisasyon nga agsuratda iti kaasitgan nga election officer para iti panakaipatungpal ti roadshow kadagiti lugarda tapno maamoanda ti feature ken no kasano a maaramat ti baro a makina.
Sigun kenni Atty. Tabangin-Capuyan, malaksid iti Automated Counting Machines (ACM) roadshow, manarimaan metlaeng ti implementasyon ti Commission on Elections checkpoint kadagiti nagduduma a paset ti pagilian ken ti gun ban nga agleppas met inton June 11,2025.
Kinuna ni Atty. Tabangin-Capuyan nga iti gun ban ket adda dagiti mabalin a mailaksid kas dagiti makaala iti gun ban exemption babaen iti panakaipaay iti Certificate of Authority.
Mangrugi ti aplikasyon iti daytoy iti online ken adda dagiti masapol a bayadan, kalpasanna dayta ket maipasidong iti valuation ken mauray ti panang-aprobar ti Commission on Elections.
Dumanon met iti dua a lawas ti panakaala iti gun ban exemption.
Kabayatanna, imbinglay ni Atty. Tabangin-Capuyan nga naannayas ti implementasyon daytoy kasta met a sumagmamano nga indibidual laeng ti aglablabsing iti dayta.
Iti agdama, agtaltalinaed iti green category ti Baguio City ken ti probinsya iti Benguet kabayatan ti election period.//Bombo Mera Pacpacan
