Sumangsango iti nagduduma a karit ti Commission on Elections (COMELEC) Mountain Province iti panagsagana para iti umadanin nga eleksion.
Daytoy ti imbinglay ni Atty. John Paul Martin, Provincial Election Supervisor iti Comission on Elections (COMELEC) Mountain Province, iti pannakiuman iti Bombo Radyo kenkuana.
Maysa kadagiti kangrunaan a pakaseknan a dinakamatna ket ti nalawa unay a geograpiya iti nasao a probinsia. Numan pay saan nga adu unay ti botante, naiwaras met ti komunidad, gapuanan tapno narigat a madanon iti amin a residente, nangruna kadagiti geographically isolated ken disadvantaged areas.
Dakkel a karit metlaeng ti kinakurang iti internet connectivity kadagiti adu nga opisina iti election officers.
Sigun kenni Atty.Martin, adda dagiti lugar a nakapsot wenno dandani awanan iti signal, a makaap-apektar iti transmission ken dadduma pay a teknikal nga aspeto iti eleksion.
Gapu iti daytoy, kayatna a makikoordinar ti COMELEC Mountain Province iti Department of Information and Communications Technology (DICT) ken iti Department of the Interior and Local Government tapno mapasayaat ti koneksion iti nasao a lugar.
Maysa metlaeng nga isyu ti accessibility iti voting centers, nu sadinno kaaduan kadagitoy ket masarakan kadagiti parapubliko a pagadalan, a kadawyan a nagadayo iti pagtaengan dagiti sumagmamano a botante. Numan pay mabalin nga aramaten dagiti barangay hall, adda metlaeng dagiti gundaway a saan daytoy nga umdas tapno marisut ti kasapulan iti aldaw iti eleksion.
Innayonna pay a sumangsango metlaeng ti COMELEC Mt. Province iti kinakurang iti logistical resources karaman ti transportasion a numan pay kayatda a makipaset kadagiti one-stop shop ken serbisyo caravan ket limitado laeng ti lugan a mabalin a mabulod.
Iti baet kadagiti daytoy a karit, agtultuloy ti panagregget iti COMELEC Mountain Province a maiyasideg ti serbisioda iti publiko babaen iti off-site registration tunggal Sabado ken Domingo, tapno ad-adu pay nga umilo ti madanon ken maipaayan iti gundaway a makipaset iti eleksion.| via Althea Lopez, Bombo Local News Correspondent
