Nagpakdaar ti Commission on Higher Education (CHED), iti publiko a saanda pay nga inwaragawag dagiti aplikasion para Iti Academic Year 2024-2025 student subsidy.
Kasaruno daytoy ti agwarwaras iti social media a publicity materials nga addaan ti seal ti Commission on Higher Education (CHED) a mangaw-awag iti publiko, nga agaplikar para iti P5,000 a cash assistance kadagiti amin a nagturpos iti elementaria, high school, senior high school ken college students.
Sigun kenni Prospero de Vera III, Chairman ti Commission on higher education, sukimaten a nalaing dagiti impormasion ken agkedked a makipaset kadagiti transaksion dagiti indibidual nga agpampamarang a kameng ti nasao nga ahensia wenno ti UniFast.
Innayon pay ni de Ver III a kitaen dagiti opisial a website ken beripikado nga account dagitoy, para iti aniaman nga impormasion wenno anunsio a mainaig kadagiti programa nga ipatpatungpal ti Commission on Higher Education ken Unified Student Financial Assistance System for Tertiary Education (UniFAST).
Kabayatanna, nagpakdaar pay ti Department of Education a saan kuma nga ited dagiti nagannak ti impormasion ken pakabigbigan ti pagadalan dagiti annakda, kadagiti agwarwaras iti social media nga addaan ti DepEd logo ken cutout ni Vice President ken Education Secretary Sara Duterte a mangibagbaga a kasapulanda laeng ti school Identificationa card, tapno makaawatda ti scholarship money para daytoy iti kinatalged dagiti annakda ken pamiliada manipud kadagiti manangallilaw.
