Inwaragawag ti Department of Transportation (DOTr) – Cordillera a dumanon iti 96.86% a public utility vehicles ti nakapagconsolidate bayat a 96.96% ti nakapagconsolidate nga UV express.
Iti agdama, dumanonen iti 307 a modern public utility vehicles ti agbibyahe kadagiti 39 a ruta nu sadino 201 kadagitoy nga unit ket nakaawaten ti subsidiya manipud iti gobyerno.
Sigun kenni Modernization Program Focal Person Engr. Elmer Mendoza Jr., manipud iti P80-K nga equity subsidy idi tawen 2018 ket ngimmato iti P160-K idi tawen 2020 bayat a nagbalin a P280-K ti subsidiya iti agdama nga administrasyon.
Kinuna ni Mendoza a pakabuklan a P46.48 million ti naipaay a subsidiya kadagiti 201 a modernized public utility vehicles a nagtaud kadagiti lima a kooperatiba iti rehiyon Cordillera.
Maipalagip a ti Public Utility Vehicle Modernization Program ti gobyerno ket addaan panggep a mangsukat kadagiti sigud a jeepneys iti climate-friendly vehicles ken tapno sumayaat pay ti transportasyon ti pagilian.
