BAGUIO CITY – Kanunaan ti rehiyon Cordillera nga agar-aramat iti Land Transportation Management System (LTMS) nga online sytem ti Land Transportation Office (LTO).
Iti interview ti Bombo Radyo Baguio, imbinglay ni LTO CAR Regional Director Francis Ray Almora nga amin a regional ken district offices ti LTO-Cordillera ket agar-aramaten iti LTMS nga agserbi kadagiti kliente dagitoy.
Sigun kenkuana, aminen a transaksion ti nasao nga ahensia ket mabalin nga dumanon ken maipaay kadagiti kliente babaen ti online ken saanen a kasapulan ti panagturongda iti opisina malaksid no kasapulan.
Inyunay-unayna nga amin dagiti transaksion a maipatpatungpal iti opisina ket masarakan iti nasao a sistema kas iti panagparehistro ken renewal dagiti lisensia dagiti drivers.
Kinunana a malaksid a mangipaay daytoy iti naparpartak a sebisyo, maliklikan metlaeng ti panakabiktima ti publiko manipud kadagiti fixers.
Malaksid iti dayta, maksayan pay ti oras a panagturong dagiti kliyente iti opisina ken maliklikan ti face to face contact.
Inayonna a nanayonan ti bilang ti maak-akomodarda a kliyente manipud nangrugi ti nasao a sistema ken panggepda a nayonan pay personnel dagitoy a mangimando iti nasao a sistema.
