BAGUIO CITY – Marigrigatan itan ti dadduma nga overseas Filipino workers (OFWs) sadiay Lebanon gapu iti krisis nga ituntunda ti COVID 19 pandemic.
Sigun ken ni Bombo International Correspondent Teressa Galvez, maysa nga OFW sadiay Beirut, Lebanon, adu a Pinoy worker sadiay ti naawan iti trabaho ken maipatpatungpal ti “no work, no pay”.
Kinunana a kangrunaan nga apektado dagiti undocumented nga OFWs kagiddan ti panagrikep ti adu a kompania, factory ken dadduma pay a lugar a pagtrabahuan.
Dinakamatna a marigrigatan dagiti OFWs gapu ta awan ti tulong a maaw-awatda manipud kadagiti kompania.
Kinunana pay nga adu a Pinoy ti makipilpila no adda dagiti relief goods a maipaay nga uray noodles laeng ngem no maminsan ket saan latta dagitoy a makaal-ala iti relief goods.
Impettteng pay ni Galvez a doble itan ti rigat a mapaspasaran dagiti OFWs sadiay Lebanon nangruna ta saanen dagitoy a maka-sideline gapu iti nakaro a kina-istrikto ti maipatpatungpal a lockdown.
Maibasar iti listaan, dumanonen iti nasurok 570 ti positibo a kaso ti COVID 19 sadiay Lebanon, nasurok 60 dagiti pimmusay ken 19 dagiti nagimbag manipud iti nasao a sakit.
