BAGUIO CITY – Inlawlawag ti Benguet General Hospital (BeGH) nga awan ti kinapudnona ti sayangguseng nga adda ti umaw-awat iti komisyon iti panakataming dagiti pasyente iti COVID-19 iti nasao nga ospital.
Sigun kenni Dr. Meliarazon Dulay, Chief of Hospital ti BeGH, ti nasao nga ospital ket imatmatonan ti gobyerno ti probinsiya ti Benguet kas economic enterprise.
Impaganetgetna a nainget nga ipatpatungpalda ti No Billing Balance Policy para kadagiti indigent patient wenno nakukurapay a pasyente iti sidong iti Philhealth sakbay pay ti agdama a pandemya.
Kinunana a kaipapanan daytoy a ti philhealth ti mangibaklay iti babayadanda iti pasyente depende iti sagsagabaenda a sakit.
Innayonna nga adda met ti programa nga ipatpatungpal dagitoy tapno agnumar met iti Philhealth dagiti saan a miyembro iti daytoy.
Nupay kasta, dinakamatna nga adda ti kanayunan a bayadan dagitoy no agalada iti serbisyo dagiti pribado weno personal a doktor dagitoy.
Sigun pay kenkuana, no adda man ti nailaw-an a binayadan dagiti pasyente ket rumbeng nga ipakaammo dagitoy kadagiti maseknan nga empleado ti ospital para iti panakaiproseo ti refund.
Malaksid iti daytoy, inlawlawag pay ni Dr.Dulay nga awan ti bayadan dagiti amin a covid-patients iti panakatamingda iti ospital kas panagtungpal iti nayetnag a memorandum circular.
Nupay kasta, kinunana nga agdepende daytoy iti case rate dagiti pasyente.
Kinunana a saan a bayadan ti Philhealth dagiti mild cases gaputa dagiti laeng maadmitar iti isolation facility dagiti sakupen ti isolation package.
Innayonna pay a no adda man ti mainaynayon a professional fee kadagiti babayadan iti ospital ket saan a maipapaay daytoy kadagiti doktor a mangas-asikaso kadagiti pasyente no di ket maur-urnong dagitoy a pagbibingayanto dagiti amin nga empleado ti ospital kas insentibo kadagitoy.
