BAGUIO CITY – Awan pay iti dua a porsiento kadagiti umili ti Baguio ti nakarehistro iti COVID-19 Vaccination Master Listing ti lokal a gobyerno ti siudad.
Imbinglay daytoy ni Mayor Benjamin Magalong kagiddan ti panangdakamatna nga agtaltalinaed a karit iti lokal a gobyerno ti Baguio no kasano a maipangato ti bilang dagiti umili nga agpabakuna kontra iti COVID-19.
Kinunana nga ak-aksionan ita ti lokal a gobyerno ti nasao a karit nga intunda dagiti negatibo a pablaak seknan iti bakuna kontra iti COVID-19.
Dinakamatna pay nga iti kaawan ti Vaccine Information Management System nga agtaud iti nasyonal a gobyerno ket adda ti buklen ti Baguio a bukod a sistema a maaramat iti COVID-19 Vaccination Master Listing iti siudad.
Sigun kenkuana, ti nasao a sistema ket maar-aramaten iti dadduma a pagilian ken daytoy ket libre nga ipaay ti service provider para iti Baguio ken dagiti datus ket mainayon to lattan iti sistema nga ited ti nasyonal a gobyerno.
Puntirya ti lokal a gobyerno a mabakunaan kontra iti COVID-19 ti agarup 190,800 a residente ti siudad tapnu maragpat ti herd immunity ken ti nasao a bilang ket katukad ti 70 percent iti popolasyon ti Baguio.
Kabayatanna, naisayangkat idi kalman ti COVID-19 Vaccination Master Listing para kadagiti residente ti Fairview Village, Quezon Hill, Victoria Village ken dadduma pay a barangay a masakupan ti nasao a barangay health district.
Sigun met kenni Fairview Punong Barangay Justina Andaya, pattapattaenda a dumanon iti lima ribo a residente ti barangayda ti kwalipikado iti nasao a Master Listing.
Innayonna nga agtultuloy ti panangikampanyada iti barangayda iti kinapateg ti panagbakuna kontra iti COVID-19.
