Impakammo iti Philippine National Police (PNP) a bimmaba iti 12.86% ti crime rate iti pagilian idi Nobiembre.
Iti datos manipod iti nasao nga ahensya, 2,615 a krimen manipod iti nagduduma a lugar iti pagilian ti nailista iti nasao a bulan, nababbaba ngem iti 3,001 a krimen a nailista idi Oktubre ita metlaeng a tawen.
Maibasar iti rekord, bimmaba iti 35.27% ti kaso a panagrames wenno rape; 17.24% ti bimmabaan iti kaso iti physical injury; 14.18% iti murder; 9.38% ti bimmabaan iti kaso a theft; bayat a 2.37% met iti carnapping of motorcycles.
Malaksid iti dayta, bimmaba metlaeng ti kaso dagiti cybercrime idi Nobiembre a 311 laengin manipod iti 379 a bilang daytoy idi Oktubre.
Sigun kenni Acting PNP Chief Lt. Gen. Jose Melencio Nartatez Jr., maysa daytoy a nagdur-asan dagiti datos para iti kampanyada kontra iti kriminalidad ngem impettengna a saanda latta nga agpakampante.
