Mapadpadaanan ti maangay a cultural dance a paset ti Baguio Flower Festival inton bigat sadiay Melvin Jones Grandstand,Baguio City.
Iti panakiuman ti Bombo Radyo kenni Andrew Pinero, Media Relations Officer-Hotel & Restaurant Association of Baguio, kinunana a daytoy nga aktibidad ket addaan panggep a mangipakaammo iti nabaknang a tradisyon ken kultura iti Rehiyon Cordillera.
Iti sabali a bangir, kinuna ni Pinero a “full swing” ti maipatpatungpal a preparasyon para iti mapadpadaanan nga highlight ti Baguio Flower Festival a Grand Street Dance Parade ken Grand Floral Float Parade inton February 22 ken February 23.
Sigun kenni Pinero, nainget ti panag-ensayo dagiti street dancers para iti umadanin a parada.
Malaksid iti dayta, manarimaan ti panakaaramid dagiti nagduduma a floats a makipaset kadagiti tallo a kategorya ti kompetisyon a pakairamanan iti big float category, ti medium float category ken ti small float category.
Innayon ni Pinero nga agarup baente ti participants iti float parade ken dagitoy ket maar-aramid sadiay Baguio Convention Center kasta met sadiay Baguio Country Club.
Kabayatanna, naituding a rambakan ti Baguio Country Club ti 128th anniversary dagitoy inton February 18, nu sadino maipatungpal ti 128th super centennial parade inton Biyernes a mangrugi iti oras ti alas kwatro ti malem.//Bombo Mera Pacpacan
