Imbinglay ti abogado ti agassawa a Discaya a nangipila ti kampoda iti writ of Habeas Corpus iti korte seknan iti pannakaibalud ni Curlee Discaya iti Senado.
Sigun kenni Atty. Cornelio Samaniego III, legal counsel da Sarah ken Pacifico Discaya, ti nasao a petision ket tapno kiddawen a mawayawayaan ni Curlee manipod iti Senate detention facility.
Daytoy ket kasaruno ti panagtalinaed paylaeng ti kliyentena iti kustodiya ti Senado kalpasan a na-cite in contempt iti naisayangkat a panagdenggeg ti Senate Blue Ribbon Committee.
Patien ti nasao nga abogado a rumbeng a mawaya-wayaan ni Curlee Discaya gaputa awan ti naikeddeng nga schedule a sumaruno a panagdenggeg ti komite seknan iti flood control projects anomaly investigation.
Kagiddan iti daytoy, impaganetget ni Atty. Cornelio nga agtuloy latta ti pannakitinnulongda iti imbestigasion ken ti panagturongda iti Department of Justice para iti maisaysayangkat a case buildup.
Gapu iti dayta, matalek ti abogado dagiti Discaya a mapatgan ti petision a habeas corpus a kiddawda iti korte.
