BAGUIO CITY – Impatangken ti dadaulo ti Public Order and Safety Division (POSD) ti lokal a gobyerno ti Baguio nga ituloyna latta a mangtungpal kadagiti mandatona ken saan daytoy nga agikkat iti pwesto.
Reaksion daytoy ni POSD chief Marvin Herrera iti manarimaan nga online petition ken kadagiti komento iti social media seknan iti panagikkatna iti posisyon gapu kadagiti isyu a sangsangwenna kas iti panagmaltrato, panag-harass, saan a nasayaat a kauugali ken panagabuso iti posisyon.
Iti eksklusibo nga interview ti Bombo Radyo Baguio, kinunana nga awan ti maaramidanna iti nasao a petisyon ngem agingga nga awan ti desisyon ni Mayor Benjamin Magalong ket ituloyna ti trabahona.
Dinakamatna a nakasagana met daytoy nga agtungpal ken agsubli iti pribado a biagna no adda man ti pammilin nga agtaud iti mayor.
Inyunay-unayna a saan daytoy nga agtatakaw ken kriminal tapnu nakaro nga ukumen ti publiko ken saan a ti naaramidna a biddut ti mangpakpakita iti kinasiasinona.
Impeksana metlaeng a malidayan daytoy gaputa dagus daytoy a naukom gapu laeng iti maysa a video a saan met a kompleto ken saan a mangipakpakita iti pakabuklan ti napasamak.
Inyapela pay ni Herrera ti saan a panakairaman ti pamilyana iti isyu a sangsangwenna ita.
Kabayatanna, inyapelana kadagiti kakadwana iti POSD ti panangituloy latta dagitoy a mangaramid wenno mangtungpal iti mandato a naipaay kadakuada, iti saanda a panagpaabak kadagiti pammabalaw wenno kritisismo ken iti panangitakderda iti linteg.
Impasigurado pay ni Herrera ti panangsuportarda kadagiti kakadwada nga enforcers nangruna no umno ti panangipatungpal dagitoy iti mandato a naipaay kadakuada.
