![](https://img.bomboradyo.com/baguio/2022/07/LOAKAN-AIRPORT.jpg)
BAGUIO CITY – Tarigagay ti Department of Tourism (DOT)-Cordillera ti dagus a panakaisubli ti operasyon ti Loakan Airport iti Baguio City.
Sigun kenni DOT-Cordillera Regional Director Jovi Ganongan, napintas ti nagbalin a waragawag ni President Ferdinand Marcos Jr iti SONA daytoy a manayonan ken ma-upgrade dagiti airport iti pagilian.
Gapu iti daytoy, mangnamnama ti sektor ti turismo iti napartak a panakaadal ken panakaisubli ti operasyon ti Loakan Airport kas kanayonan a mangguyogoy kadagiti turista nga agpasyar iti siyudad dagiti saleng.
Immuna metten nga impeksa ni Baguio City Mayor Benjamin Magalong ti tarigagay na a maisubli ti operasyon ti nasao nga airport kas all-weather commercial airport.
Sigun iti mayor, nakitaripnong daytoy kenni President ken Chief Operations Officer ti Philippine Airlines a ni Stanley Ng para iti “possible venture” ti Civil Aviation Authority of the Philippines (CAAP) ken ti Department of Transportation (DOTr).//Jordan Tablac