Makidkiddaw ita iti Senado ti dagus a panang-aprubarna iti maisaksakad a P1,000 a pension tunggal bulan para kadagiti amin a senior citizen sakbay nga agleppas ti maika-19th Congress.
Ti House Bill No. 10423 wenno ti Universal Pension for Senior Citizens Act ket naaprubaranen iti maikatlo ken maudi a pannakaibasana iti kongreso idi May 2024 ngem nakatambak pailaeng iti Senado.
Panggep ti nasao a gakat nga ipaayan dagiti amin a Filipino senior citizen iti social pension kas panangsubalit iti kontribusyon dagitoy iti komunidad.
Nakalanad pay iti House Bill No. 10423 a dakkel a tulong ti maipaay ti social pension kadagiti senior citizen nga awanan iti pagbiagan.
Iti agdama ngamin ket dagiti laeng 4 million indigent senior citizen ti makaaw-awat iti P1,000 a social pension tunggal bulan babaen iti Expanded Senior Citizens Act.
Iti kanito a mapagbalin a linteg ti maisaksakad a Universal Pension for Senior Citizens Act, maipaayan met dagiti agarup 7 million a saan nga indigent senior citizens iti P500 a social pension tunggal bulan.
Kada lima a tawen ket manayon iti P100 ti awatenda a social pension agingga nga agbalin daytoy a P1,000 tunggal bulan.
