BAGUIO CITY – Manaynayonan pay dagiti pamilya iti rehion Cordillera a maap-apektaran iti agdama a nepnep ken dagiti mailislista a danyos iti nagduduma a sektor gapu iti mapaspasaran a napigsa a panagtudo.
Iti kaudian a report ti Cordillera Regional DRRM Council, dumanonen iti 17,160 a pamilya a bukbuklen ti nasurok 64,700 nga indibidual ti apektado iti nepnep.
Nailanad a 13 a pamilya a bukbuklen ti 53 nga indibidual ti nagkamang kadagiti evacuation centers bayat a 238 a pamilya a bukbuklen ti nasurok 1,000 nga indibidual ti nagkamang iti kabagian wenno kaaruba dagitoy.
Dumanon metten iti 283 dagiti naapektaran a barangay kadagiti 37 a munisipyo iti rehion.
Nagkissay metten ti Ambuklao Dam ken Binga Dam iti Benguet iti panagpaluspos dagitoy ti danum kalpasan a sag-dua laeng a gates ti inlukat dagitoy iti agpada a kangato a maysa a metro.
Iti met report ti DPWH-Cordillera, maysa a road section ti punch-thru bayat a 24 a road sections ti one-lane passable ken tallo a road sections ti nakarikep iti trapiko.
Dumanon met iti P5.3-M ti inisyal a gatad ti danyos kadagiti kalkalsada iti rehion bayat nga agarup P17.3-M iti sektor ti agrikultura, partikular iti livestock, high value crops ken mais.
Iti agdama, adda met ti nakasagana a nasurok 26,700 a family food packs iti DSWD-Cordillera bayat a nanayonan iti 500 sets ti sleeping kits, 50 rolls ti laminated sacks ken 50 sets ti family tents ti stockpile ti ahensia.
