TAIWAN – Dukduktalen dagiti otoridad ti danyos dagiti nadadael nga istruktura ken casualties iti 7.5 magnitude a ginggined a napasaran idiay Taiwan itay agsapa.
Iti interview ti Bombo Radyo kenni Teresita Gavina, Bombo International News Correspondents – Taiwan, 7:58 idi agsapa idi narikna da ti kapigsaan a panagdayyeg.
Maibasar met iti United States Geological Survey (USGS), ti sentro ti ginggined ket 18 kilometers iti abagatan ti Hualien city nga addaan kauneg a 34.8 km idiay Taiwan nga addaan iti nakaro a pannakadadael dagiti pasdek.
Innayon pay ni Gavina nga agarup maysa a minuto a narikna ti panagdayyeg ti daga.
Kinunana met a nasayaat ti kasasaadna iti agdama pakairamanan dagiti gagayyemna a Pinoy nga agtrabtrabaho sadiay.
Kabayatanna, naikkaten ti tsunami warning nga impayulog ti PHIVOLCS kadagiti coastal area iti Pilipinas ken sadiay Japan.
Karaman kadagiti lugar a naballaagan ket ti Batanes Group of Islands, Cagayan, Ilocos Norte, Isabela ken daduma pay a lugar nga asideg iti Pacific ocean.
Malaksid iti dayta, kinuna ni Gavina a tunggal bulan ket mapaspasaranda ti panagdayyeg sadiay Taiwan ngem saan a kapada ti 7.5 magnitude a narikna iti agdama a bulan.//Bombo Marinel Rodrigo
