BAGUIO CITY – Nakasagana ti tulong manipod iti Department of Agriculture para kadagiti mannalon a naapektaran iti kalamidad.
Pakairamanan daytoy ti Quick Reaction Fund (QRF) kadagiti mannalon a miyembro ti Farmers Cooperative and Associations, ti pondo para iti rehabilitasyon dagiti pagmulaan, survival and recovery loan, ken ti crop insurance.
Sigun paylaeng kenni Jonathan Llanes, Information Officer iti Regional Agriculture and Fisheries Information Section ti Department of Agriculture – Cordillera, maipatpatungpal ti joint validation kadagiti Local Government Units ken dagiti Agriculture Program Coodinating Offices tapno makita ti umno a pamuspusan wenno intervention a maipaay kadagiti mannalon nga agkasapulan ti tulong.
Sigun kenni Llanes, saan nga agpapada ti tulong a kasapulan dagiti nagduduma a mannalon rason a maipatpatungpal ti validation ken evaluation kadagitoy.
Kagiddan dayta, mapalapaligan dagiti mannalon nga agparehistro iti Registry System for Basic Sectors in Agriculture (RSBSA) ti Department of Agriculture gapu ta datoy ti ar-aramaten ti nasao nga ahensya para iti panangipaayda ti tulong kadagiti mannalon.
Kabayatanna, dumanon iti 93% agingga 94% a mannalon iti rehion Cordillera ti nakapagparehistro iti nasao a sistema.//Bombo Rob Dominguez
