Nagballaag ti Department of Foreign Affairs (DFA) ita nga aldaw iti baet ti pangta a mairuar ti “unverifiable recordings” wenno saan a naberipikar a nairekord maipapan iti maatap a “new model” a katulagan idiay Ayungin Shoal.
Sigun kenni Maria Teresita Daza, pannakangiwat ti nasao nga ahensia, kasapulan a saan a maallilaw ken maiyaw-awan ti nagduduma nga ahensia ti Pilipinas ken dagiti Pilipino iti maatap a katulagan dagiti opisiales ti Philippine military ken ti Chinese diplomat maipapan iti addang iti Ayungin Shoal idiay West Philippine Sea gaputa maysa daytoy a taktika.
Kasaruno gamin ti pangiruar ti Chinese diplomats iti sumagmamano a media nga adda ti napasamak a panagsarita iti nagbaetan ti Armed Forces of the Philippines – Western Command (AFP WESCOM) chief ken ti Chinese diplomat maipapan ti mapapati nga “arrangement” idiay Ayungin Shoal.
Iti agdama, awan pay ti komento ti Chinese Embassy in Manila maipapan iti nasao a banag.
Immunan a kinuna ti Chinese Embassy a nakitulag ti Armed Forces of the Philippines – Western Command iti China maipapan iti “baro a modelo” para iti panangtarawidwid iti kasasaad iti Ayungin Shoal.
Nu pay kasta,pinaglibakan ken inlawlawag ti Department of Foreign Affairs nga awan ti siasinnoman nga opisial iti sidong ti
adminstrasion ni Marcos ti simrek iti aniaman a katulagan iti gobierno ti China maipapan ti Ayungin Shoal.
Pinaglibakan metlaeng daytoy ti Department of National Defense (DND) ken ti National Security Council (NSC) ti nasao a katulagan.
Kabayatanna, ni AFP WESCOM commander Vice Admiral Alberto Carlos ket naglangan gapu iti “personal” a rasonna ngem inlawlawag ti Armed Forces of the Philippines a saan a maipapan iti “new model”.
