Inakusaran ti Department of National Defense ti China a nangisponsor kadagiti kriminal a sindikato bayat ti panangidepensa iti pannakaideploy dagiti mid-range missile assets ti US iti Pilipinas.
Sigun kenni Department of National Defense Secretary Gilberto Teodoro, bayat ti panangbabalaw ti Chinese Communist Party iti panagrang-ay ti kabaelan ti Pilipinas, agtultuloy met ti panangibangon ti China iti nuclear arsenal ken ballistic missile ken panangisponsorda kadagiti kriminal a sindikato, ken saanda a kayat nga itandudo ti karbengan ti tao.
Itay laeng gamin kanikadua, plano ti Pilipinas a maala ti US Typhon missile system kas paset ti panangipasiguradoda ti interes ti baybay.
Ti mid-range missile system ti US Army ket naikabil iti amianan a Pilipinas iti umuna a bulan iti agdama a tawen para iti tinnawen a joint military exercises kaduana ti nabayagen nga kaalyadona, ken naikeddeng a maibati sadiay iti laksid ti pammabalaw ti Beijing a magdestabilize daytoy iti Asia.
Sipud idi, inaramat daytoy ti puersa ti Pilipinas tapno masanay para iti operasion dagitoy.
Ti inisiatiba wenno addang ket paset ti kolaborasion ti Philippine Army kaduana ti Philippine Navy and Philippine Air Force a salakniban ti “maritime” ken “airspace” ti Pilipinas iti baet ti panangikalintegan ti China a kukuada ti baybay ken ti agresibo a tignay dagitoy iti South China Sea.
Ti kaadda ti US missile launcher iti amianan a Pilipinas ti nangrurod iti Beijing, a dagiti puersa ti navy ken coast guard ket nakipaset iti kumarkaro a komprontasion kadagiti napalabas a bulan iti Pilipinas gapu kadagiti mapagsusupiatan a reef ken danum iti South China Sea.
Kabayatanna, inlawlawag ni Teodoro a ti pannakaideploy ti nasao a missile iti Pilipinas ket lehitimo ken ligal.
