Nagballaag ti Department of Educaiton (DepEd) a saandan a palubusan nga ag-enroll iti sumaruno nga school year dagiti estudyente a mangar-aramid iti bomb threat wenno anyaman a bomb joke.
Sigun iti DepEd, karaman daytoy iti third level offense wenno ti kangatuan a tukad ti panaglabsing iti pagadalan.
Innayon ti ahensiya a ti bomb threat wenno bomb joke ket mangitunda iti panic, pannakaitantan ti klase ken posible nga agtungpal iti criminal case.
Sigun kenni Education Secretary Sonny Angara, saan koma a rumbeng nga ibilang nga angaw ti bomb threats, napeggead a prank ken fake news agsipudta mangitunda ti peggad iti kinatalged dagiti estudiante ken mangsinga iti panagadal.
Iti sidong ti DepEd Order No. 006, series of 2026, ti umuna a panaglabsing ket agresulta iti non-readmission; ken ti maikadua a panaglabsing ket agresulta iti dagus nga exclusion wenno pannakaikkat iti pagadalan.
Kabayatanna, ti pannakaiwaras dagiti fake news wenno prank a pakaigapuan ti pannakariro iti uneg ti pagadalan ket maibilang a minor offense ken addaan iti katupag a dusa depende iti bilang dagiti panaglabsing.
Nangipaulog ti DepEd iti pakdaar kalpasan a nagwaras dagiti fake news mainaig iti maatap a pammaltog iti Bagong Silangan High School sadiay Quezon City, a nakaigapuan ti panagbuteng dagiti nagannak ken estudyante.
