Inladawan ni Davao City 1st District Representative Paolo “Pulong” Duterte a “political theater” ti nagbalin a desisyon iti International Criminal Court(ICC) a saan a patgan ti nakiddaw nga interim release ni sigud a president Rodrigo Duterte.
Binabalawna ti nasao a pangngeddeng kasta metten dagiti maatap nga adda iti likudan ti panakaibalud ti ama daytoy iti detention facility idiay The Hague, Netherlands.
Patien ni Pulong a nagbalin a puntirya iti political persecution ti ama daytoy a ni FPRRD uray idi adda daytoy iti Pilipinas kalpasan a nasukatan iti takem kas presidente
Immuna metten nga impeksa ti kongresista a baseless wenno awan ti nakaibasaran ti panakaarestar ti sigud a presidente idi Marso ita a tawen.
Para kenkuana, maysa daytoy a criminal act partikular ti kidnapping ken impanamnamana kadagiti tattao a patienna nga adda iti likudan daytoy nga agpulloda iti inaramidda.
