BAGUIO CITY – Naipabiangen iti Executive ti desisyon seknan iti kiddaw dagiti Talipapa vendors a maituloy ti panaglakoda sadiay Barangay Country Club.
Maipalagip a naipasardeng paylaeng ti panaglako dagitoy iti rason nga inukuparda ti road right of way a nagserbi kas paglakoan dagitoy.
Iti interview ti Bombo Radyo Baguio, kinuna ni Councilor Philian Louise Weygan-Allan a saan a naaprubaran ti singasing ti legislative a mailaylayon ti panaglako dagiti talipapa vendors iti kondisyon a maikkat dagiti istruktura a simmubra iti road ostruction.
Gapu iti daytoy, irekrekomendarna ti panagsapul dagiti opisyal ti barangay country club iti satellite market dagitoy tapno isu ti paglakoan dagiti naapektaran a vendor.
Mangnamnama met daytoy nga inkonsidera ti Executive ti pagbiagan dagiti talipapa vendors sakbay a buklenda ti pinal a desisyon.
