Palpalawaenna pay iti Lokal a Gobierno iti Benguet ti dialysis services kadagiti district hospital gapu iti panagadu iti kaso iti sakit iti bato, karaman dagiti ub-ubing a pasiente.
Sigun kenni Benguet Governor Dr. Melchor Daguines Diclas, panggepda a mangikabil iti dialysis units iti amin iti district hospital tapno maiyasideg ti pag-agasan kadagiti residente, nangruna kadagiti addayo a lugar.
Iti agdama, adda iti duapulo a dialysis units iti Benguet General Hospital, bayat nga adda metlaeng ti baro a pasdek iti Bokod ken Atok. Panggepda metlaeng a mangibangon iti unit idiay Buguias.
Kagiddan iti daytoy, napainget metlaeng ti kampania iti panangliklik iti sakit iti bado babaen kadagiti health programs ken outreach services.
Nagpalagip iti lokal a gobierno ken Department of Health a pagtalinaeden ti nasalun-at nga estilo ti panagbiag—kessayan ti asin ken asukar, ag-ehersisio, liklikan ti panagsigarilio ken nakaro nga arak, ken saan nga uminum iti agas nga awanan iti reseta.
Panggep ti lokal a gobierno a mapababa ti kaso iti nasao a sakit ken maliklikan ti panagadu iti agkasapulan iti dialysis.
