BAGUIO CITY – Saan a feasible ti paset ti daan nga Antamok open pit ti Benguet Corporation a maisaksakad a mapagbalin kas integrated solid waste disposal facility ti siudad ti Baguio.
Nagbalin a resulta daytoy ti panagadal nga insayangkat ti joint technical personnel ti Environmental Management Bureau (EMB) – Cordillera ken ti Mines and Geosciences Bureau (MGB) – Cordillera.
Sigun kenni EMB-Cordillera regional director Reynaldo Digamo, awan ti paset ti nasao a disso ti nakapasa iti nainget unay a criteria nga itudtuding ti National Solid Waste Management Commission gaputa iti laeng terrain ket saan a pimmasa ti singasing a disso iti criteria gaputa nakaro a bakras wenno nakuyas ken kaaduan a baro sadiay ket nabetbettak.
Innayonna nga adda ti nakitada a mabalin a pakaipasdekan ti pasilidad ngem saan a daytoy ti paset a maidonar para iti nasao a pasilidad ti Baguio.
Impasigurado met ni General Services Office – Solid Waste Management Division Head Dominador Urbanozo iti panakiyuman ti Bombo Radyo a saan nga agsarsardeng ti lokal a gobyerno ti Baguio tapnu agbiruk iti umno a lugar a mabalin a pakaipasdekan ti pasilidad a mangrisut iti parikut ti basura iti siudad.
Kinunana a nasurok 20 nga ektarya ti ididiaya ti nasao a korporasyon isut gapuna nga agtitinnulong dagiti maseknan nga ahensia ti gobyerno kas iti EMB, MGB, Benguet Corporation ken ti LGU-Baguio iti panakabiruk ti dadduma a disso sadiay a feasible para iti plano.
Dinakamatna pay a ti plano nga integrated solid waste disposal facility ket buklen ti landfill, centralized material recovery facility, anaerobic digester, special waste treatment plant, medical and toxic waste treatment plant, waste to energy plant ken ti pakaikabilan ti dua nga Environmental Recycling System (ERS) machines.
