Impaganetget ni Dr. Aileen Marie Caluza-Buliyat iti Baguio General Hospital and Medical Center (BGHMC) ti kinapateg iti infertility awareness iti maysa a saritaan a naisayangkat iti DOH-CAR Training Center itay kallabes, maipapan iti National Infertility Awareness Week.
Sigun kenkuana, maysa kadagiti tunggal sangapulo nga agassawa a Pilipino ti marigatan a maaddaan iti anak ngem adu ti saan a mairepreport gapu iti “stigma” ken kinakurang iti pannakaamo.
Inlawlawagna metlaeng nga agpada a maap-apektaran ti babai ken lalaki iti infertility.
Kadagiti babbai, kadawyan a ti rason ti infertility ket ti “ovulation,” barado a fallopian tubes, ken endometriosis, bayat a dagiti lallaki ket nababa nga sperm count, nakapsut nga sperm motility, ken saan a nasalun-at a panagbiag a kas iti panagsigarilio ken panaginum iti arak.
Maguygoyugoy dagiti agassawa nga agpakonsulta tapno maipasidong kadagiti check-up ken makabukel iti umno nga agas. Karaman kadagiti kadawyan a tests ti semen analysis, ovulation tracking, ultrasound, ken hormone tests, a mabalin a dumanon iti P5,000 agingga P60,000 depende iti kasapulan.
Sakbay ti komplikado a panangaas a kas iti IUI wenno IVF, mairekrekomendar paylaeng ti panagbalbaliw iti lifestyle ken dagiti simple a medikal nga addang.
Nadakamat metlaeng ti kinapateg iti natalged a pannakinaig tapno maliklikan ti sexually transmitted infections (STIs) a mabalin a makaapektar iti fertility.
Mapalpalagipan met dagiti agassawa nga agpakonsulta iti OB-GYN wenno fertility specialist, nangruna nu saan paylaeng a mabuntis kalpasan ti maysa a tawen, wenno innem a bulan nu agtawen iti 35 agpangato.
