BAGUIO CITY – Sumangsango iti nagtutuon a kaso ti maysa a driver a nagpammarang nga empleyado ti World Health Organization (WHO) kalpasan a nakemmeg ditoy siudad ti Baguio.
Nabigbig daytoy a ni Ernesto Burro Ferrer Jr., 39-anyos ken residente ti Pasig City.
Maibasar iti report ti Baguio City Police Office – Station 9, dimmalan iti checkpoint sadiay Purok 3, Irisan, Baguio City ti driver kadwana ti uppat a Locally Stranded Individuals (LSIs) ken ti alternate driver daytoy a managan Romer Sunga Meneses, residente ti Pampanga.
Kinuwestionaran dagiti pulis ni Ferrer gaputa awan ti impakitana a dokumentoda iti alternate driver-na bayat a kompleto ti dokumento dagiti uppat a pasaheroda nga LSIs.
Kabayatan ti panagdamdamag ti pulisya, impakita ni Ferrer ti maysa nga ID nga addaan tatak a WHO a mangipakpakita nga empleyado daytoy ti nasao nga international organization.
Inrason pay ni Ferrer a nangipaay ti WHO iti assistance kadagiti LSIs tapno mapaawidda ditoy siudad.
Naiturong da Ferrer, Meneses ken dagiti LSIs iti triage area sadiay Teacher’s Camp ngem kabayatan ti panagturongda iti triage area, ditoy metten a biniripikar ni PCPL Sharon Patacsil kenni WHO Public Information Officer Gina Maramag no pudno nga empleyadoda ni Ferrer.
Nupay kasta, naduktalan a bugos wenno peke ti ID nga imparang ni Ferrer.
Ditoy metten nga inaklon ni Ferrer a pinartuatna laeng dagiti WHO IDs daytoy ken inmuntarna ti WHO signage iti luganna tapno agparang nga Authorized Person Outside Residence (APOR).
Gapu iti daytoy, sumangsango ti bugos a WHO personnel iti kaso a Falsification of Documents, Usurpation of Authority ken panaglabsing iti RA 11332 wenno ti “Law on Reporting of Communicable Diseases”
Naiturongen daytoy ken ti luganna iti kostudiya ti pulisya ken naipilan dagiti kaso kontra kenkuana.
