BAGUIO CITY – Nakemmeg ti maysa a lalaki bayat a nakalibas ti kadwana kalpasan a naaktuwan dagitoy iti maysa a drug session sadiay Bulanao, Tabuk City, Kalinga.
Nabigbig ti nakemmeg a ni Alan Ramirez, 49-anyos, naasawaan, driver ken residente ti Cambaog, Bustos, Bulacan.
Sigun iti pulisya, nakaawatda iti impormasyon seknan iti manarimaan a pot session iti maikatlo a kadsaaran ti maysa a resto bar sadiay Bulanao.
Dagus a nagresponde dagiti pulis ken nadanunda iti lokasyon dagiti dua.
Ginandat dagiti dua a naglibas ngem napaay ni Ramirez gaputa dagus daytoy a nakemmeg nupay nakalibas ti kadwana babaen iti fire exit ti pasdek.
Narekober ti maysa a pakete ti mapapati a shabu ken nagduduma a drug paraphernalia.
Iti agdama, sumangsango ni Ramirez iti kaso a panaglabsing iti Comprehensive Dangerous Drugs Act of 2002.
