BAGUIO CITY – Nakemmeg ti maysa a drug personality iti maikadua a gundaway iti buy-bust operation nga insayangkat dagiti otoridad sadiay Maria Pucay Street, Guisad Central, Baguio City idi Biyernes, July 19.
Nabigbig daytoy a ni Ramil Gabito Ong, 50-anyos, naasawaan ken residente ti Lower Fairview, Baguio City.
Nakumpiskar kenkuana ti tallo a pakete ti mapapati a shabu.
Sigun iti PDEA-Cordillera, ni Ong ket target-listed personality dagiti otoridad ken nalatak gapu iti illegal drug trade daytoy ditoy Baguio City.
Innayon ti ahensia a daytoy ti maikadua a panakakemmeg ni Ong iti kapada a panaglabsing.
Immunan a nakemmeg ni Ong ken tallo pay a kakadwana iti buy-bust operation idi October 2011 ken nakaruar daytoy iti pagbaludan idi August 2013.
Gapu iti panakakemmegna manen ket sumango ni Ong iti kaso a panaglabsing iti RA 9165 wenno ti Comprehensive Dangerous Drugs Act of 2002.
