BONTOC, MT. PROVINCE – Nasarakan ti dua a bangkay iti Agkhuyo River idiay Fengar, Barangay Samoki, Bontoc, Mountain Province ita nga aldaw, June 30, 2026.
Nabigbig ti maysa a biktima a ni Jeremiah Binan Guing-oy, 25 – anyos ken residente iti Poblacion, Mankayan, Benguet bayat a ti maysa a biktima ket 38-anyos, residente iti Middle Quirino Hill, Baguio City.
Agpada dagitoy nga impleyado ti lokal a bakeshop iti nasao a munisipyo.
Maibasar iti post-mortem examination nga insayangkat ni Municipal Health Officer Dr. Diga Kay Gomez, naduktalan a pimmusay dagiti biktima gapu iti pannakalmes.
Iti inisyal nga imbestigasion dagiti otoridad, nagturong dagiti dua a biktima ken dagiti tallo a kakaduada iti karayan tapno agdigus idi June 29, 2026.
Pasado 3:00 PM, nagturong dagiti dua a biktima iti paset ti karayan tapno agdigus.
Nupay kasta, saandan a nagsubsubli iti sumagmamano nga oras isu’t gapuna a biniruk dagiti kakaduada iti pasado 6:00 PM.
Impakaammoda metlaeng ti pannakapukaw dagitoy iti Bontoc MPS, pasado 7:30 PM.
Sigun kadagiti maseknan nga otoridad, nasarakan dagiti tumtumpaw a bangkay iti agsapa ti Hunio 30, 2026.
Naipatungpal metten ti “Palanga, Khaeb si Uminoman” wenno tradisional a cleansing ritual kalpasan ti retrieval operations.
Nakikoordanaren ti Bontoc Local Government Unit iti local government units ti Mankayan ken siudad ti Baguio tapno mapakaamuan ti pamilya dagiti biktima.
Iti agdama, agtultuloy latta ti imbestigasion dagiti otoridad seknan iti napasamak na insidente.
Kabayatanna, umap-apela ti Bontoc Municipal DRRM Council iti publiko nga ipaay ti panagraem ken liklikan ti negatibo a komento seknan iti napasamak nga insidente.
