![](https://img.bomboradyo.com/baguio/2021/08/NICOLE-CABARLO.jpg)
BAGUIO CITY – Natiliw ti dua a drug personalities iti rehion Cordillera iti buy-bust operation sadiay Ferdinand Barangay, Baguio City itay nabiit.
Nabigbig dagitoy a da Nicole Ann Cabarlo, 22-anyos, balasang, encoder, residente ti Camp Allen Subdivision, Baguio City nga immunan a natiliw idi 2018 ken nakalista kas maysa kadagiti Regional Top Ten Illegal Drug Personality iti Cordillera ken ni Jayson Fangki Domingo, 32-anyos, baro, laborer, residente ti Pico, La Trinidad, Benguet a nakalista nga Street Level Individual.
Nagresulta ti operasyon iti panakakumpiskar ti maysa a pakete ti maatap a shabu nga agdagsen ti agarup nasurok maysa a gramo ken ti cellphone nga inaramat dagiti suspek iti transaksionda iti operatiba.
Narekober metlaeng kadagitoy ti naaramat a buy-bust money.
Iti agdama, sumangsango dagiti dua iti kaso a panaglabsing iti RA 9165 wenno ti Comprehensive Dangerous Drugs Act of 2002.