BAGUIO CITY – Nailista ti probinsia ti Apayao ti dua a kaso ti P3 variant ti COVID-19 kas maibasar iti panagadal ti Philippine Genome Center.
Agpada a residente ti Conner dagiti dua a nakaptan iti P3 variant ti COVID-19, maysa a 21-anyos a babai ken maysa a 26-anyos a lalaki a municipal government employee nga agpada a nagpositibo idi Marso ken naideklara a naimbaganen.
Gapu iti daytoy, mangisayangkat manen iti re-testing ti technical working group ti Apayao Provincial Health Office ken ti Conner Rural Health Unit kadagiti amin a line-listed a close contacts dagiti dua a kaso.
Babaen iti daytoy ket mabigbig dagiti posible a kaso ti panagakar ti P3 variant ti COVID-19 sadiay Conner.
Naituding metlaeng a mangisayangkat ti Provincial IATF iti field monitoring sadiay Conner ita a lawas ken irtenganda pay ti expanded testing kadagiti barangay ti Malama ken Calafug kadagiti sumaruno a dua a lawas.
Kagiddan iti daytoy, ibalbalakad latta ni Apayao Governor Eleanor Bulut-Begtang ti panagtalinaed dagiti umili sadiay a nakalma ken ituloyda laeng ti panagsurotda iti minimum publich health standards.
