BAGUIO CITY – Natiliw ti dua a lallaki iti nagsina a PNP-COMELEC checkpoints sadiay Bangued, Abra idi kalman gapu iti panaglabsingda iti nationwide gun ban kagiddan ti nangrugin nga election period.
Immuna a natiliw ni John Mark Castillo, 21-anyos, residente ti Banacao, Bangued.
Maibasar iti report, pinara dagiti pulis ti tricycle nga imanmaneho ni Castillo ken idi iruarna ti lisensiana manipud iti sling bag, nakita dagiti pulis ti nasao a paltog.
Kinumpiskarda ti paltog a maysa a caliber 45 a naglaon ti innem a bala malaksid pay iti pouch a naglaon ti 43 a bala para iti nasao a paltog kalpasan nga awan ti naipakita ni Castillo a dokumento ti armas.
Simmaruno met a natiliw ni Ariel Bugtong Jr., 28-anyos, residente ti Sagap, Bangued.
Maibasar iti report, pinara dagiti pulis ni Bugtong Jr. ngem saanna nga inkankano dagitoy isut gapuna a kinamatda daytoy agingga a naaksidente ken nakita iti siketna ti maysa a paltog.
Nakumpiskar ti nasao a paltog a maysa a berreta a naglaon ti walo a bala kalpasan nga awan ti naipakita ti Bugtong a dokumento daytoy.
Sumango metten dagiti dua iti kaso a panaglabsing iti RA 10591 wenno iti Comprehensive Firearms and Ammunition Regulation Act ken iti election gun ban.
Impasigurado met ni Bangued Municipal Police Station Acting Chief of Police, Major Nazarino Emia ti agtultuloy ken naing-inget a PNP-COMELEC checkpoint tapnu matiliw dagiti indibidual nga agim-imet ti armas nangruna ita a nangrugin ti election period para iti May 2022 National and Local Elections.
