BAGUIO CITY- Napilaan iti kaso a robbery with intimidation ti dua a menor-de-edad kalpasan a nagtakaw dagitoy iti maysa a gas station babaen iti panagaramatda ti replica ti paltog sadiay Barangay Bulo, Tabuk City, Kalinga idi rabii ti Hunyo 12.
Ti dua a suspek ket agtawen iti 17-anyos ken 16-anyos.
Maibasar iti imbestigasyon ti Tabuk City Police Station, sinumrek ti dua a menor de edad iti store ti gas station iti alas otso ti rabii ken nagpammarang dagitoy kas kustomer.
Nupay kasta, idi nadlaw dagiti suspek a pimmanawen dagiti daduma a kustomer ket ditoy nga intutok ti maysa kadagiti suspek ti gun toy iti 19-anyos a manager nga adda iti cashier bayat a ti kadwana ket nangala ti sigarilyo ken inkabilna iti backpack.
Dagus a rinumwar dagiti suspek idi nakitada nga adda ti kustomer a sumrek iti nasao nga establishemento.
Nupay kasta, nagpukkaw ken nagkiddaw a dagus ti tulong ti manager kadagiti daduma a kustomer ken passerby rason a nalapdan ti gandat a panaglibas dagiti suspek.
Naiturong dagitoy iti Tabuk City Police Station ken nakumpiskar manipud kadakuada ti replica ti caliber .45, uppat reams ti sigarilyo, maysa a cellphone, maysa a relo ken P5,562 a cash.
