Pimmusay dagiti dua a motorcycle riders iti napasamak a vehicular traffic incident idiay Badiwan New Bridge, iti paset ti Marcos Highway, Badiwan, Poblacion, Tuba, Benguet, idi Huebes, Oktubre 15.
Maibasar iti report a nakalap ti Bombo Newsteam manipud kadagiti otoridad, maysa nga Innova ken dua a motorsiklo ti nairaman iti nasao nga insidente.
Nabigbig ti driver ti Innova a maysa a 23-anyos a lalaki ken residente ti Magsaysay, Baguio City. Maysa kadagiti motorcycle riders ti menor de edad.
Maibasar iti inisyal nga imbestigasion ti pulisya, paturong iti Baguio City ti Innova idi inobertakenna ti maysa a pick-up truck.
Nupay kasta, nasabatna ken nadungpar dagiti dua a motorsiklo.
Gapu iti napigsa a puersa ti pannakabangga dagitoy, nagsagrap iti nakaro a nunor ken napukaw ti puot dagiti dua a biktima.
Dagus a naiturong dagitoy iti ospital babaen iti Tuba Municipal Disaster Risk Reduction and Management Office (MDRRMO).
Nupay kasta, naideklara a pimmusay dagitoy.
Nagsagrap iti heavy damages ken undetermined cost dagiti amin a lugan.
Kabayatanna, temporario a nawayawayaan ti driver ti Innova kalpasan a nakapagpiyansa. Nupay kasta, nangipila ti nagannak ti maysa kadagiti biktima iti kaso kontra iti driver.
Gapu iti nasao nga insidente, agpalpalagip dagiti otoridad kadagiti motorista nga agbalin a responsable iti panagmaneho, obserbaran ti BLOWBAGETS, agtungpal kadagiti traffic signs ken dadduma pay a pagannurotan iti kalsada tapno maliklikan dagiti aksidente.//mp4
