Maysa a landslide ti napasamak iti maysa a Compound sadiay Sitio Lasong, Tadiangan, Tuba, Benguet idi kalman ti malem a nangitunda iti pannakadadael ti dua a nakaparada a lugan.
Iti report dagiti kapulisan ken maibasar iti pannakipatangda iti maysa a residente iti nadakamat a lugar, bayat nga ada dagitoy iti uneg ti pagtaenganda ken panagtuloy ti panagbayakabak iti tudo, nakangngeg dagitoy iti napigsa nga uni iti ruar.
Apaman a sinukimatda ti nagtaudan daytoy, dita da metten a nakita a ginaburan ti daga ken concrete nga alad dagiti lugan a nakaparada.
Dagos met a rinespondean daytoy dagiti barangay officials iti nasao a lugar kadua dagiti kapulisan.
Iti inisyal a panangsukimat dagiti kapulisan, nagcollapse ti paset ti bantay iti sango ti Badicao residential house pakairamanan ti concrete barriers nga isu ti nang-gabor kadagiti lugan a maysa a Hyundai Grace ken Toyota Hi-Ace.
Awan met ti nadangran iti nasao nga insidente. Naikoordinar meten ti nasao a barangay iti Tuba Municipal Disaster Risk Reduction and Management Office.//via Bombo Noveh Organo
