Naarestar ken sumango ita iti kaso a robbery ken murder ti dua a Pilipino a maatap a nangpapatay iti dua nga Hapon idiay Malate, Manila itay laeng nabiit.
Sigun iti Manila Police District, rumrumwar a dagiti suspek ket binayadan iti maysa nga indibidwal a nakabase idiay Japan tapno ubraen ti nasao a krimen kasukat ti dakkel a gatad ti kwarta.
Sigun kadagiti otoridad, ti ub-ubing a suspek ti nagserbi a gunman bayat a ti laklakay a kabsat daytoy ti nagpammarang kas tour guide para kadagiti biktima.
Kabayatanna, kwinestyunaran met iti abogado dagiti suspek ti legalidad ti panakaarestar dagitoy ngem pinagtalinaed iti Manila Police District a ti panagarestarda ket maitunos iti paglintegan.
Mainaig iti dayta, immuna metten a kinondenar iti Department of Tourism ti insidente gapu ta sigun iti ahensya, nakaitunda daytoy iti travel warnings kadagiti nagduduma nga embahada ken mabalin metlaeng a makaapektar iti imahe iti pagilian ken panagsangbay dagiti turista.
Maipalagip nga idi laeng August 15, dua a saan pay nabigbig a Janapense Nationals ti pinalpaltugan dagiti suspek iti Malvar Street idiay Malate, Manila.
