BAGUIO CITY – Pinirmaanen ni PNP Chief, Police General Guillermo Eleazar ti dismissal order dagiti dua a pulis a nangpapatay iti kailyan a pulis manipud Benguet nga immunan nga inreportda a kaso ti panagkettel iti biag sadiay Quezon City.
Sigun kenni Eleazar, guilty ni Police Corporal Sherwin Rebot iti kaso a Grave Misconduct partikular ti murder, panaglabsing iti Presidential Decree 1829 wenno Obstruction of Justice, Simple Irregularity in the Performance of Duty partikular ti loafing, Less Grave Neglect of Duty wenno drinking while on duty ken Conduct Unbecoming of a Police Officer.
Kinunana a guilty met ni Police Corporal Harold Mendoza iti Less Grave Neglect of Duty partikular ti ‘drinking while on duty’, Simple Irregularity in the Performance of Duty partikular ti loafing ken Conduct Unbecoming of a Police Officer.
Agpada a suspek da Rebot ken Mendoza iti panakapapatay daydi Police Corporal Higinio Wayan manipud Buguias, Benguet no sadino, agkakadwa dagitoy iti Kamuning Police Station 10 ti Quezon City Police District.
Innayon ni Gen. Eleazar a ti panakaikkat iti serbisyo ti dua a pulis ket pammaneknek a pagsungsungbaten ti PNP ti asinoman a pulis nga aglabsing iti linteg.
Maipalagip a naduktalan a saan a nagipaputok iti paltog ni Wayan kalpasan a nagnegatibo ti paraffin test iti bagi daytoy bayat nga inaklon ti sibilyan a suspek a ni Lorenzo Lapay a ni Rebot ti nangpaltog kenni Wayan kalpasan a naabak iti sanggol.
