Possible a dumanon iti dua agingga uppat a bagyo ti mapasaran iti Pilipinas ita a bulan.
Iti panakiuman ti Bombo Radyo kenni Mar Santos, Weather Observer ti PAGASA-Baguio, kinunana a possible a mapasaran dagiti nasao a bagyo no sadino ti sumaruno manen a bagyo ket mapanaganan iti Kiko.
Kagiddan dayta, kinunana nga agtultuloy latta a mapasaran iti siudad ti Baguio ken kadagiti dadduma a lugar ti masansan a panagtudtudona nangruna iti parbangon ken iti malem.
Possible metlaeng a mapasaran ti napigsa a panagbayakabak ti tudo kasta metten ti panagguruod gapu paylaeng iti localized thunderstorm.
Kinunana met nga agtultuloy a maiwanwanawan ti Low Pressure Area iti pagilian ngem possible metlaeng a marunaw daytoy iti kabiitan a panawen.
Kabayatanna, nagpalagip met daytoy iti publiko a kanayon nga agridam iti aglawlaw, agbalin nga updated iti sasaaden ti panawen, agannad ken kanayon a mangitugot iti payong iti kanito a rumuar iti pagtaengan nangruna ket masansan ti panagtudtudona.
