Dead on arrival ti dua bayat a nadangran ti tallo kalpasan a nadungpar dagitoy ti maysa a van sadiay Cypress, Irisan, Baguio City idi July 12, 2025.
Karaman kadagiti pimmusay ti agtawen iti 35 ken 60 bayat nga adda iti kritikal a kasasaad ti masya a babae nga agtawen iti 34.
Immuna a kinuna ti maysa a residente, nagparada ti driver iti salugan iti igid ti kalsada tapno gumatang laeng iti sidaen dagitoy.
Nupay kasta, kellaat a nagandar ti nasao a van rason a nadungparna dagiti agarup lima nga indibidual a magmagna iti nasao a kalsada.
Iti pannakiuman ti Bombo Radyo kadagiti umili sadiay mapapati a nakatalikod a magmagna dagiti biktima rason a saanda a nakita ti nasao a lugan.
Pinadas met ti driver a kamaten ti nasao a lugan ngem saannan a nabaelan daytoy.
Kabayatanna, manarimaan paylaeng ti naun-uneg nga imbestigasion seknan iti nasao nga insidente.
