BAGUIO CITY – Inlawlawag ti Department of Trade and Industry (DTI) ti sistema ti naiyusuat a rolling store iti probinsia ti Benguet ken iti siudad ti Baguio kagiddan ti manarimaan nga Enhanced Community Quarantine gapu iti COVID-19.
Iti interview ti Bombo Radyo Baguio kenni DTI – Baguio-Benguet Provincial Director Freda Gawisan, kinunana a babaen iti rolling store ket maksayan ti panagturong dagiti tattao kadagiti merkado publiko ken kadagiti supermarkets gaputa maidanunen kadagitoy dagiti produkto.
Dinakamatna nga iti Benguet ket narugianen ti rolling store sadiay Tuba ken nakaserbida iti uppat a barangay idi March 24-27 bayat nga iti siudad ti Baguio ket ‘by district’ ken pilot test paylaeng inton umay a Biyernes ken Sabado kadagiti napili a distrito.
Inlawlawagna pay nga iti rolling store scheme ket adda dagiti sari-sari stores a bigbigen a mismo ti lokal a gobyerno ken alaen met ti DTI ti listaan dagiti kasapulan dagitoy a groserya ken ipaimada kadagiti retailers para iti panakai-repack dagiti nasao a produkto.
Innayonna nga akem met ti DTI a mangitulod kadagiti mai-repack a produkto kadagiti napili a sari-sari stores.
Dinakamatna metlaeng nga adda ti mainayon nga agricultural products kas iti nateng ken prutas iti rolling store.
Inaklon pay ti opisyal a saan nga amin a sari-sari stores iti Benguet ken iti Baguio ket turongen ti rolling store gaputa limitado ti manpower dagiti retailers ken nasken a maipaayan dagitoy iti panawen a mangsukat iti suplay ti produkto dagitoy.
