--Ads--
Naituding a maipatungpal ti eleksyon sadiay Nepal inton March 5, 2026 kalpasan a rinakrak ni Nepali President Ram Chandra Poudel ti parliamento dagitoy.
Ti desisyon ket naaramid kasaruno ti makalawas a tignay-protesta sadiay a nakaitunda iti ipupusay dagiti adu nga indibidwal.
Iti daytoy met a nadutukan ti kaunaan a babae a prime minister iti Nepal kasaruno ti panaglusulos ni K.P. Sharma Oli.
Ni Sushila Karki a baro a prime minister ket nagserbi kas chief justice iti nasao a pagilian.
Maipalagip nga idi laeng napan a lawas ket nagrally dagiti tattao iti Nepalese Parliament kalpasan nga imparit ti gobyerno sadiay ti panagaramat iti social media.
Iti nasao a rally, ipukpukkaw metlaeng dagiti tattao ti panakaisardeng ti korapsyon.
