Imbilinen ni Presidente Rodrigo Duterte ti panakaipaluspos ti nasurok P130-M para iti binulan a P2,000 financial grant para iti tunggal miembro ti Citizen Armed Forces Geographical Unit (CAFGU) kas pammigbig iti kontribusyon dagitoy iti laban ti gobyerno kontra iti insurhensia ken iti terorismo.
Sagudayen ti Executive Order (EO) 94 ti panakaipaay ti financial support para iti tunggal miembro ti CAFGU Active Auxiliary (CAA) a nangrugi kuma idi July 1 ti agdama a tawen.
Nailanad iti pammilin a dagiti laeng nadutukan a miembro ti CAA Service Units nga adda iti listaan ti Armed Forces of the Philippines ken dagiti aktuwal a mangipapaay iti serbisyo ti agnumar iti nasao a pinansial a suporta.
Naamuan a ti P139-M ket saan a nailanad iti EO 94 ngem na-compute kas maibasar iti nilang dagiti CAFGU nga insumitir ti AFP kabayatan ti deliberasyon ti ti pondoda sadiay Kamara.
Mairaman nga agnumar iti pammilin dagiti maipaspasidong ita iti panagsanay tapnu agbalin a CAFGU la ketdi makompletoda ti panagsanayda.
Dinakamat ti EO 94 ti panakabuangay ti CAFGU babaen iti EO 265, series 1987 nga agserbi kas suporta ti regular forces ti armada ti pagilian iti panaglaban iti security threats iti pagilian.
Naituding nga ag-epekto ti pammilin iti kabiitan a panawen.
