BAGUIO CITY – Isagsaganan ti DSWD-Cordillera dagiti family food packs a maiwaras to kadagiti residente iti rehiyon a maapektaran iti epekto ti manarimaan nga Enhanced Community Quarantine gapu iti COVID-19.
Sigun kenni Cordillera Regional DRRM Council Response Clusters chair ken DSWD-Cordillera regional director Leo Quintilla, puntiryada a makaisagana ti family food packs nga umdas iti 24 nga aldaw para iti mapattapatta a 100,000 a vulnerable households iti rehiyon.
Maibasar met iti impormasyon nga inruar ti DSWD-Cordillera, addaanda iti P3.51-M nga standby fund; agarup 2,900 a family food packs nga aggatad ti agarup P1.2-M; nasurok 1,640 a family kits; naurok 2,000 nga sleeping kits ken nasurok 1,000 a hygiene kits.
Nupay kasta, linawlawagan ni Quintilla nga agserbi nga augmentation ti ipaayda a taraon kadagiti maapektaran iti COVID-19.
Sigun kenkuana, umno a mangited iti food support ti lokal a gobyerno gaputa dagitoy iti frontliners iti kampanya kontra COVID-19.
Kinunana a kasapulan a bigbigen pay dagiti barangay officials dagiti kangrunaan nga apektado a pamilya iti barangay dagitoy ken maisumitir ti listaan kadagiti lokal a gobyerno wenno iti opisina ti mayor para met iti panagkiddaw dagitoy iti augmentation manipud iti DSWD.
Dinakamatna pay nga iti planoda ket maaddaan iti sag-dua a production area ken food hub ti tunggal probinsia para iti panakai-repack ken panakaiwaras dagiti family food packs tapnu mabibiit a maipadanun ti tulong kadagiti agkasapulan.
